Material adimendun eta multifuntzionalak garapen teknologikoa bultzatzeko

Material adimendunak, material aktiboak edo multifuntzionalak deritzenak, presioa, tenperatura eta inguruneko hezetasuna bezalako kanpoko estimulu fisiko edo kimikoei erantzunez, ohiko propietateak aldarazteko gaitasuna duten egiturak dira.

Ezaugarri horien harira, osagai hauek garraioa, energia eta biomedikuntza bezalako esparruetan aplikatzeko aukera handiak dituzte. Fabrikazio aditiboa eta inprimaketa-teknologia berriak bezalako fabrikazio aurreratuko teknikekin konbinatuz gero, material hauek garrantzia handikoak izan daitezke 4.0 Industria eta “Gauzen Interneta” bezalako esparruetan, eta garrantzi handiko ondorioak ekar ditzakete gizartean, ekonomian nahiz lan arloan, besteak beste.

BCMaterials (Basque Center for Materials, Applications and Nanostructures) zentroaren egungo zuzendari zientifikoa den Senentxu Lanceros-Mendez fisikariak osagai horien garrantzia aztertuko du otsailaren 27an, arratsaldeko 19:00etatik aurrera, Bilboko Bidebarrieta Liburutegian (Bidebarrieta kalea, 4) eskainiko duen “Material adimendun eta multifuntzionalen garrantzia egungo garapen teknologikoan” izenburuko hitzaldian.

Jendaurreko agerraldian, Ikerbasqueko ikertzaileak material adimendun berrien arloan egindako ikerketaren alderdirik nabarmenenak emango ditu ezagutzera, baita material horiek ahalbidetuko dituzten aplikazioak eta horien ondorio ekonomiko eta sozialak ere.

Senentxu Lanceros-Mendez Fisikan lizentziatu zen UPV/EHUn eta Julius-Maximilians-Universität Würzburg (Alemania) Unibertsitatean doktoratu zen. Sentsoreetan, aktuadoreetan, energian eta biomedikuntzan aplikatzeko moduko material adimendun eta multifuntzional berrien garapena da ikertzaile honen jardunaren ardatz nagusia.

Hitzaldia UPV/EHUko Kultura Zientifikoko Katedrak eta Bidebarrieta Liburutegiak hilabetero gaurkotasunezko gai zientifikoak ezagutzera emateko antolatzen duten “Bidebarrieta Zientifikoa” zikloari atxikita dago.

Sarrera: librea, doakoa baina gonbidapenarekin

Hitzaldi guztietarako sarrera librea eta doakoa da lekuak bete arte, baina aurretik, gonbidapenak eskuratu behar dira liburutegian bertan, otsailaren 22tik aurrera. Gonbidapenak jasotzeko ordutegia 10:00etatik 14:00etara bitartekoa da goizez eta 16:00etatik 20:00etara bitartekoa arratsaldez, astelehenetik ostiralera.

Bertaratzeko aukerarik ez dutenek hitzaldiak streaming bidez ikusi ahal izango dituzte esteka honen bitartez.

Xehetasunak

Data:
2019ko otsailaren 27a
Ordutegia:
19:00etatik 20:30etara

Egoitza

Tokia:
Bidebarrieta Liburutegia
Helbidea:
Bidebarrieta 4
Hiria:
Bilbo

Eman iritzia

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>