Nola funtzionatzen du iparrorratz batek?
Zergatik jotzen du beti iparraldera iparrorratz batek? Galdera sinplea dirudi, baina erantzunak planeta osoa hartzen du barne. Iparrorratzaren barruan iman txiki bat dago, ardatz baten gainean aske biratzen dena, eta Lurraren eremu magnetikoarekin lerrokatzen dena. Horregatik seinalatzen du beti norabide jakin bat.
Izan ere, Lurra bera iman erraldoi bat da: bere kanpo nukleoan dagoen burdin urtuaren mugimenduak eremu magnetikoa sortzen du, eta horrek gidatzen du iparrorratzaren orratza. Hala ere, ipar magnetikoa ez dator bat zehazki ipar geografikoarekin, eta gainera, denborarekin mugitzen ari da. Bideo honetan ikusiko duzu nola orientatzen gaituen tresna txiki batek Lurraren indar ikusezin bati esker.
Zergatik gertatzen dira gauzak Ikusgela hezkuntza proiektuaren bideo-sorta bat da. Euskal Wikilarien Kultur Elkartearen ikus-entzunezko egitasmoa da eta EHUko Kultura Zientifikoko Katedraren laguntza izan du.