Haur batek eztula egiten duenean, beste batek kopetatik beroa dario, eta beste batek tripako mina duenean… zer ote da? Hain ñimiñoak dira, non ezin baititugu begi hutsez ikusi, baina mundua goitik behera alda dezakete. Birusak dira, eta Birusak: zer ote, zer ote? (2020) liburuak haurrei erakusten die izaki begi-bistaz ikusezin horiek nolakoak diren, zertarako balio duten eta nola jokatzen duten gure gorputzean eta inguruan.
Ellas Educan kolektiboak idatzitako testuak eta Mariona Tolosa Sisteréren marrazki koloretsuek haurrei azaltzen diete birusak, nola zabaltzen diren eta haien eragina gure osasunean zein ingurunean. Pandemien garaian sortutako ziurgabetasunari aurre egiteko, liburu honek galdera ugari planteatzen ditu, eta zientziaren ikuspegitik erantzuten ditu: zer da pandemia bat? Non daude birusak? Nolakoa da birus baten egitura?
Bestalde, osasun bakarra bezalako kontzeptu garrantzitsuak ere lantzen dira, ikuspegi globalago eta integratu batetik birusak ulertzeko. Haurrek ikasiko dute birus guztiak ez direla kaltegarriak, eta batzuk, are gehiago, funtsezkoak direla naturaren orekan. Gainera, birusen katalogo txiki bat eta haien ugalketa-prozesuaren azalpena ere aurkituko dute.
Liburu honek aukera paregabea eskaintzen du etxean zein eskolan birusen inguruko oinarrizko kontzeptuak jorratzeko, beldurra baztertuz eta jakin-mina piztuz. Haurrek ulertuko dute zientziak nola laguntzen digun ingurua eta gure burua hobeto ezagutzen —eta babesten—.
Argitalpenaren fitxa:
- Izenburua: Birusak: zer ote, zer ote?
- Testua: Ellas educan kolektiboa
- Ilustratzailea: Mariona Tolosa Sisteré
- Argitaletxea: Txalaparta (TXO! bilduma)
- Urtea: 2020
- Orrialdeak: 24
- ISBNa: 978-84-18252-22-8
Iturria:
Txalaparta argitaletxea: Birusak: zer ote, zer ote?