Torres Quevedo ingeniariaren katamarana eta bestelako asmakizunen 100 urteko historia

Duela ehun urte Bilbon izandako gertakari nabarmenen protagonista izan zen Leonardo Torres Quevedo ingeniaria (1852-1939). Alde batetik, Euskalduna ontziolan eraikitako lehen katamaran modernoa, “Binave” izenekoa, probatu zuen Bilboko itsasadarrean. Bestetik, “Hispania” globo gidatu transatlantikoaren proiektua aurkeztu zuen Arriaga Antzokian, aeronautikaren arloan egindako bere azken lana.

1. irudia: Leonardo Torres Quevedok diseinatu zuen katamaran modernoa, “binave” bezala izendatu zuena. Euskaldunako ontziolan gauzatu zen eta 1918. urtean Bilboko itsasadarrean probatu zen lehenengoz. (Argazkia: Francisco Gonzalez Redondo – Torres Quevedo Museoa)

Jatorri euskalduneko ingeniariaren beste lorpen handietako bat “aritmometro elektromekanikoa” izan zen, egungo zentzuarekin historiako lehen ordenagailutzat hartu daitekeena eta Material Zientifikoaren Erakusketan aurkeztu zena.

Proiektu hauei guztiei esker, besteren artean, bere garaiko asmatzaile miresgarriena bezala izendatu zuten 1930ean. Zientziaren eta teknikaren historia unibertsalean pertsonaia garrantzitsua dela esan daiteke, hortaz.

Hala, Madrilgo Complutense Unibertsitateko irakaslea den Francisco A. Gonzalez Redondok ingeniari entzutetsu honen obrak aztertuko ditu, “Leonardo Torres Quevedo Bilbon, 1919-2019: Nautika, Aeronautika eta Konputazioa” izeneko hitzaldian. Hitzordua datorren irailaren 18an izango da, arratsaldeko 19:00etan, Bilboko Bidebarrieta Liburutegian (Bidebarrieta kalea, 4) eta Bizkaia Zientzia Plaza (BZP) ekitaldiari hasiera emango dio.

Francisco A. Gonzalez Redondo, Madrilgo Complutense Unibertsitateko Matematika, Gizarte eta Zientzia Esperimentalen Didaktika sailean dihardu lanean, eta Leonardo Torres Quevedo asmatzaile ospetsuaren figuran aditua. Quevedoren biografia eta hainbat artikulu idazteaz gain, ingeniariaren inguruko kongresuak eta erakusketak ere antolatu ditu Francisco A. Gonzalez Redondok.

2. irudia: Irailaren 18an, Bizkaia Zientzia Plaza ekimenari hasiera emanez, Bidebarrieta Liburutegian Francisco Gonzalez Redondo irakasleak Leonardo Torres Quevedo ingeniari eta asmatzaileari buruzko hitzaldia eskainiko du.

Zientziaren inguruko ekitaldi erraldoi honen parte izateaz gain, “Bidebarrieta Zientifikoa” zikloaren baitan dago kokatuta hitzaldia; hain zuzen ere, UPV/EHUko Kultura Zientifikoko Katedrak eta Bidebarrieta Liburutegiak hilero antolatzen duten zikloan.

Sarrera doakoa izango da aretoa bete arte, baina sartu ahal izateko gonbidapenak jasotzea beharrezkoa izango da. Irailaren 13tik 18ra jaso ahal izango dira gonbidapenak liburutegian bertan, astelehenetik ostiralera 10:00etatik 14:00etara eta 16:00etatik 19:00etara.

Bertaratzeko aukerarik ez dutenek hitzaldiak streaming bidez ikusi ahal izango dute KulturguneaTBren bitartez.

Xehetasunak

Data:
2019ko irailaren 18a
Ordutegia:
19:00etatik 20:30etara

Egoitza

Tokia:
Bidebarrieta Liburutegia
Helbidea:
Bidebarrieta, 4
Hiria:
Bilbo

Eman iritzia

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>