Zaintzaileen ongizatea, gizartearen ongizatea

Zaintzan aritzen direnak, familian zein arlo profesionalean, gizarte-kohesioa bermatzeko funtsezko zutabea dira. Bere papera bereziki garrantzitsua da Euskadi bezalako lurraldeetan, non Euskal Estatistika Erakundearen (Eustat) datuen arabera, 65 urtetik gorako pertsonak biztanleriaren % 23 ziren 2022an.

Hala eta guztiz ere, zaintzan aritzen direnen errealitateari buruzko ikerketak oraindik ez du merezi duen arreta jaso. Zainketak goitik behera baldintzatzen du lan hori egiten dutenen familia-bizitza, lan esparrua eta gizarte-bizitza. Gainera, eragin zuzena du euren osasunean eta ongizatean eta, ondorioz, baita beraien kargu dauden pertsonei ematen dieten zainketen kalitatean ere.

Erronka horren inguruan gogoeta egiteko, Ana Rodriguez Larrad fisioterapeuta, EHUko irakasle eta ikertzaileak “Zaintzaileen ongizatea, gizartearen ongizatea” hitzaldi-solasaldia eskainiko du Bilboko Bidebarrietako Liburutegian datorren asteazkenean, urriak 29, 19:00etan.

Hitzaldian zehar, Rodriguez Larradek zaintzaileen osasuna eta bizi-kalitatea hobetzeko estrategien esperientziak eta ebidentziak partekatuko ditu: ariketa fisikoko programetatik hasi eta exoeskeletoak bezalako konponbide teknologiko berritzaileetaraino.

Hitzaldi-solasaldia euskaraz emango da, EHUko Kultura Zientifikoko Katedrak eta Bidebarrieta Liburutegiak bultzatutako Bidebarrieta Zientifikoa hitzaldi-zikloaren barruan. Aurrez aurre zein streaming bidez jarraitu ahal izango da, KulturguneaTB kanalean. Sarrera librea da, eserlekuak bete arte.

Hizlaria

Ana Rodriguez Larrad Osasun Publikoan eta Medikuntza Prebentiboan doktorea da Euskal Herriko Unibertsitatean. Gainera, fisioterapeuta da eta EHUko Medikuntza eta Erizaintza Fakultateko Fisiologia Sailean irakasle.

Bestalde, ikerketa-lana egiten du AgeingOn taldean, ariketa eta jarduera fisikoaren bitartez pertsona guztientzako zahartze osasungarria eta bizigarria sustatzeko ezagutza sortzen.