Einstein: marraztutako biografia

Arantxa Arzamendi

Zientzia Kaieraren argitalpenen atalean inoiz ez dut komiki baten gomendioa irakurri, baina duela aste batzuk Liburutegian liburu baten bila nenbilela Einsteinen biografia hau ikusi nuen eta egokia iruditu zitzaidan bereziki, irakurle gazteengana hurbiltzeko.

einstein biografia dibujada

Denok ezagutzen dugu Albert Einstein (1879-1955), XX. mendeko zientzialari handienetako bat. Fisikaria eta matematikaria izan zen eta haren teoriek filosofian ere eragin handia izan zuten. Einsteinen aurkikuntza zientifikoak liburuetan ikasi izan ditugu baina esango nuke bere bizitza ez dugula gehiegi ezagutzen nahiz eta argitalpenak ugariak izan. Komiki honek berezitasun bat dauka, Einsteinen bizitzara modu grafiko batean hurbiltzeko aukera ematen digu.

Komikiaren egileak bi dira, Anne Simon (1980) ilustratzaile frantsesa, komikietan espezializatua eta Corinne Maier (Ginebra, 1963), berriz, idazlea eta psikoanalista da eta historian nabarmendu diren pertsonaiei buruz idatzi izan du, besteak beste, De Gaulle, Pasteur, Marx eta Freud. Simon eta Maierrek hiru komiki idatzi dituzte elkarrekin, Freud, Marx eta hemen gomendatzen ari garen Einsteinena.

Komikiaren egitura nahiko arrunta da, modu kronologikoan kontatzen digu Einsteinen bizitza eta garaiko Europako historia bi mundu gerrak barne: haurtzaroa, familia, ikasketa garaia, aurkikuntza zientifikoak, erlatibitatearen teoria, Nobel Saria eta bizitzako azken urteak. Komikia jatorriz frantsesez argitaratu da eta hamar bat hizkuntzetara itzulia izan da, gaztelania barne. Euskaraz irakurtzeko aukera izango al dugu?

Argitalpenaren fitxa:
  • Izenburua: Einstein: una biografía dibujada
  • Egileak: Corinne Maier eta Anne Simon
  • Argitaletxea: Norma, 2015
  • Orrialdeak: 62
  • Prezioa: 16 €
  • ISBNa: 9788467920949
  • Non eskuratu: Einstein: una biografía dibujada eskuragarri dago liburutegi publikoetan, besteak beste, Donostiako Udal liburutegien sarean.

———————————————————————————-

Egileaz: Arantxa Arzamendi Sesé (@arzamendisese), Filosofia eta Letretan lizentziatua da eta egun, Donostiako Liburutegi Nagusiaren arduraduna da.

———————————————————————————-

Iruzkin 1

Eman iritzia

Einstein: una biografía dibujada, Corinne Maier, Anne Simon | Liburu Dantza

[…] Zientzia Kaiera: Post hau jatorriz Zientzia Kaieran argitaratu […]

Eman iritzia

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>