Dozena erdi ariketa udarako (1): Anaren gozokiak

Dozena erdi ariketa eta datu interesgarri

Ariketa fisikoa egitea osasungarria dela esaten digute behin eta berriro. Fisikoa bakarrik ez, buruari eragitea ere onuragarria da. Nagiak atera eta udako oporretan egiteko astelehenero ariketa matematiko bat izango duzu Zientzia Kaieran. Guztira sei ariketa izango dira.

Gogoan izan ahalegina bera –bidea bilatzea– badela ariketa. Horrez gain tontorra (emaitza) lortzen baduzu, poz handiagoa. Ahalegina egin eta emaitza gurekin partekatzera gonbidatzen zaitugu. Ariketaren emaitza idatzi iruzkinen atalean (artikuluaren behealdean duzu) eta irailean emaitza zuzenaren berri emango dizugu.

Ariketak Frantziako CNRSko blogeko Défis du Calendrier Mathématique ataletik hartuta daude eta Javier Duoandikoetxea matematikariak aukeratu ditu Zientzia Kaieran argitaratzeko. Han ostiralero ariketa bat aurki dezakezu, egutegi matematiko batetik hartuta. Egutegiak egunean ariketa bat dakar, astelehenetik ostiralera.

Hona hemen gure lehen ariketa: Anaren gozokiak.

Anaren gozokiak

1) Anak gozokiak ditu poltsa batean. Gozoki kopurua bi zifrako zenbaki bat da. Anak zifra horien batura egin eta horrenbeste gozoki ateratzen ditu poltsatik. Behin eta berriro egiten du gauza bera, poltsako gozoki kopurua zifra batekoa izan arte. Zenbat geratu zaizkio poltsan une horretan?

Hemengo ariketak eginda gehiagorako gogoa sortu bazaizu, badakizu, zoaz Défis du Calendrier Mathématique blogera edo egon adi eta lortu zure egutegia datorren urtean.

6 iruzkinak

  • Kaixo guztioi!

    Oporretan bai, baina eguraldi kaskarra, beraz buruari buelta batzuk emateko momentu paregabea! Hor goaz!

    Bi zifretako zenbaki bat adierazteko 10x + y adierazpena erabili dut, non “x” lehenengo zifra den eta “y” berriz bigarrena. Anek, bi zifren batura kentzen badu (x + y) kentzen duela esango dugu. Hau, aurreko adierazpenari, “n” aldiz kentzen saiatu naiz, baina irtenbiderik gabeko bidegurutze batera heldu naiz (gutxienez, biokimikari moduan, nire ezagutza matematikoek ez zuten irtenbiderik topatzen). Hala ere, nire pozak ez du parekorik izan emaitza muturraren aurrean neukala deskubritu dudanean!!! Pausoz-pauso joango naiz:

    (10x + y) – (x + y)
    10x + y – x – y
    9x

    Bederatzi demonio horrek zuen emaitza! Gero zientzialari onen moduan, emaitzen azalpena eta honen defentsarako argudioak topatzea zen helburua. Horretarako, nire saiakerak zoriz asmatutako bi zifretako zenbakiekin Anek egindako saiakerak egitea izan da eta beti emaitza 9 zen! (Pauso bakoitzean aurreko zenbakiaren “x” zifra bider 9 lortuz)
    Beti izan da 9!!

    Mila esker horrelakoak proposatzearren! Uda bikaina izan dezazuela!!

  • Telefono zenbakiari ekin ondoren, gozoki kopurua asmatzeari ekin genion Anaren prozesua errepikatuz. Kontua da beti toki berdintsuan amaitzen genuela, hamarrekoetan eta kasu horietan, (19, 18, 17, 16, 15, 14, 13, 12, 11 edo 10) bi digituak gehituz gero eta berari kendu emaitzak beti ematen zigula 9. Beraz, gure ustez, Anak 9 gozoki ditu.

    Laster arte,

  • Nik pentsatu dut: “Ea 20rekin hasita”
    2+0=2
    20-2=18
    1+8=9
    18-9=9
    9 da zifra bateko lehen zenbakia. TXIRIPAZ.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude