Zuhaitz-landaketak eta biodibertsitatea: kudeaketa iraunkorragoen bila

Euskadiko 2025eko Baso Maparen arabera, Euskal Autonomia Erkidegoko (EAE) azalaren % 55 inguru zuhaitzez estalita dago. Baso-azalera horren erdia baso naturalek hartzen dute, eta beste erdia zuhaitz-landaketek. Azken horien artean, radiata edo insignis pinu-landaketak nabarmentzen dira, zuhaitzez estalitako azalaren % 25 inguru hartzen baitute, eta baita eukalipto-landaketak ere, ia azaleraren % 7 hartzen dutenak.

Azken hamarkadetan, landaketa horietako batzuk, bereziki eukalipto-landaketak, gure lurraldean hedatu dira, besteak beste, hazkunde azkarra dutelako eta paperaren industria bezalako sektoreetan errendimendu handia eskaintzen dutelako. Hala ere, landaketa horiek ingurumen-ondoriak ere badituzte. Ildo horretan, EHUko Landareen Biologia eta Ekologia sailak egindako ikerketa berri batek frogatu du eukalipto-landaketetan hegazti-espezie gutxiago daudela bertako basoetan eta pinu-landaketetan baino. Gainera, sail berean egindako beste ikerketa batzuek landaketa horiek zenbait landaretan eta lurzoruko mikroorganismotan dituzten ondorio negatiboak ere aztertu dituzte.

Landaketa horiek biodibertsitatean duten eraginari buruz hausnartzeko, Unai Sertutxa Irazola ekologoa eta EHUko Landareen Biologia eta Ekologia saileko ikertzaileak, “Zuhaitz-landaketak eta biodibertsitatea: kudeaketa iraunkorragoen bila (Plantaciones forestales y biodiversidad: en busca de gestiones más sostenibles) hitzaldi-solasaldia emango du. Jarduera abenduaren 2an, asteazkenean, izango da, arratsaldeko 19:00etan, Bilboko Bidebarrieta Liburutegian. Hitzaldia euskaraz izango da, eta aldibereko itzulpena eskainiko da gaztelaniara, nahi dutenentzat.

Hitzaldian zehar, Sertutxak Euskal Herriko zenbait baso eta baso-ekosistematan barrena egingo du bidaia, hobeto ezagutzeko eta eukaliptoen eta pinuen monolaborantza-landaketek biodibertsitatean zer eragin duten azaltzeko. Zehazki, landaketa horiek garrapoa edo eskinosoa bezalako basoko hegaztietan dituzten ondorioak aztertuko ditu, baina baita ekosistema horien funtzionamenduan funtsezko zeregina duten zenbait landaretan eta lurzoruko mikroorganismotan dituztenak ere.

Halaber, baso-kudeaketa iraunkorrago baterako alternatibak proposatuko ditu, eta bertako basoak kontserbatzeak eta leheneratzeak haien biodibertsitatea babesteko duten garrantzia azalduko du.

Hitzaldi-solasaldia EHUko Kultura Zientifikoko Katedrak eta Bilboko Udaleko Kultura sailaren mende dagoen Bidebarrietako Liburutegiak antolatzen duten Bidebarrieta Zientifikoa hitzaldi-zikloaren parte da. Sarrera doan izango da, eserlekuak bete arte. Streaming bidez ere jarraitu ahal izango da, Bidebarrieta Kulturgunearen YouTubeko kanalaren bidez eta EHUko Kultura Zientifikoko Katedraren TikTok kanalaren bidez, Katedratik.

Hizlaria

Unai Sertutxa Irazola Ingurumen Zientzietan graduatua eta Baso-ekologian doktoratua da (Euskal Herriko Unibertsitatea). Gaur egun, Landareen Biologia eta Ekologia Saileko ikertzailea da EHUko Zientzia eta Teknologia Fakultatean. Basoen kudeaketa iraunkorraren eta biodibertsitatearen kontserbazioaren arteko harremana aztertzen du, ekosistemen funtzionamendua eta kontserbazioa hobetzeko helburuarekin. Azken urteotan, zuhaitz-landaketek eta, batez ere, eukalipto-landaketek ingurunean eta biodibertsitatean dituzten eragin ekologikoak ikertu ditu.